Ձեր վստահելի աղբյուրը

 Թեև իրանական կողմը դեռևս օրեր առաջ շրջանառության մեջ է դրել «Փոխըմբռնման հուշագիր ՀՀ Սյունիքի մարզի և ԻԻՀ Արևելյան Ատրպատականի նահանգի միջև» հուշագիրը, որի համաձայն իրանական կողմը հնարավոր է 5 տարի ժամկետով վարձակալի Հաաստանի Սյունիքի մարզի հողերը, Հայաստանի պատկան մարմինները որևէ հստակություն չեն մտցնում այդ հարցում:

Հայաստանի տարածքային կառավարման նախարարությունից Panorama.am-ին փոխանցել էին, թե դեռևս որևէ կոնկրետ որոշում ընդունված չէ, նույնիսկ պարզ էլ չէ՝ այդ հողերը լինելու են համայնքային, թե պետական, ուսումնասիրություններ են ընթանում: Այս պատասխանը ստանալուց մի քանի օր անց կրկին կապվեցինք նախարարության հետ, պատասխանը նույնն էր: Սյունիքի մարզպետարանի կայքում էլ գրված է. «… Հարցը դեռևս ուսումնասիրությունների փուլում է: … Քննարկումների ժամանակ արծածված` արոտավայրերի վարձակալության հետ կապված հարցերը ՀՀ օրենսդրությամբ սահմանված կարգով դեռևս համաձայնեցված չեն համապատասխան իրավասու պետական մարմինների հետ»:

Հայաստանի կառավարությունը նույնպես այս հարցի հետ կապված որևէ փաստաթուղթ, որոշման նախագիծ չի ստացել: Այն պետք է ներկայացնի տարածքային կառավարման նախարարությունը:

Հ.Գ. «ԷկոԼուր»-ի մոտ են հայտնվել երկու փաստաթղթեր, որոնցից մեկում ասված է (10.07.2012) «Իրանական կողմը իր պատրաստակամությունը հայտնեց արոտավայրերից և գյուղատնտեսական հողատարածքներից օգտվելու մասին»: Երկրորդում (15.01.2013) գրված է. «Հայաստանի կողմի առաջարկության համար արոտավայրերը այցելելու համար իրանական կողմի համաձայնությամբ այցելության ժամանակը նշանակվեց առաջիկա գարնանը»:

Նշենք, որ այսօր այս թեմայով հրավիրված է մամուլի ասուլիս, բանախոսներն են՝ բուսաբան, գիտ. թեկնածու Կարեն Աֆրիկյանը, իրանահայ ակտիվիստ Սարմեն Շահիջանյանը և այլ ակտիվիստներ:

Նախորդող նորություն՝ Սյունիքի արոտավայրերը` Իրանին. Ինչքա՞ն տարածքի, ի՞նչ գնի ու ժամկետի մասին է խոսքը